فيه ثلاثيات هلبة فى العالم يتكلموا عليهم ... لكن هادى ثلاثيات فى ليبيا بس...
ثلاثة صعب نتخلى عنها : الماء...والهواء...والبازين.
ثلاثة لازم نتخلى عليهم : التفنيص.. والتلقيح....واللُّـقني وقت العمل ....
ثلاثة تسبب الإحباط : الواسطة ... و الديون ... والمنتخب الليبي .
ثلاثة محتاجات واسطة : البعثات..والشقق...وأى مصلحة إدارية تبي تقضيها
ثلاثة يرفعوا الضغط : الملح..وزحمة المرور..والعيل كان عشش.
ثلاثة تسبب الغرور : الفيلا... والهامر..وبدلة الحرس البلدي.
ثلاثة ياكلوا في لحوم البشر: الحيوانات المفترسة...والبزناسة الكبار. وجماعة القرمة كان شبعوا .
ثلاثة ما يرقدوش الليل : المديون.. والخانب.. وواحد نايضة عليه السوسة .
ثلاثة شبه اختفوا من ليبيا : الدلاع الطويل.. واحترام الشيابين ....والفراشية
ثلاثة ما تحسش بطعمتهم الا في ليبيا : امبكبة على الحطب..وبورديم...وشاهي العالة ثلاثة تدعو لهم بالهداية : البلعوط ..والمحسدي.. والخنايسي
ثلاثة ما تستغربش منهم في ليبيا :
واحد قاص السريع على رجليه.... وواحد يسوق في الاتجاه العكسي ..... وواحد طالع في الاحمر.
ثلاثة تتمنى ما تتصبحش فيهم : سواق افيكو مستعجل....وطابورطويل في الشيل.... والمدير المتعارك مع مرته
ثلاثة ما ليهمش معنى إلا في ليبيا : العسلوز.. والزميطة.. والعصبان .
ثلاثة ربي يفكك منهم : مجاري مفتوحة......وكلب مطلوق .....ورشادة طايشة .
الجمعة أكتوبر 24, 2014 1:09 pm من طرف عيسى مفتاح
