من وحي الماضي // نذكر في هالهويده ....

الشاعر :محمد بوسوتيه
=============
نذّكر في هالهويده..غوش انريده..غاب ابسيده.. واجاويده..
موحش خاليات امواريده
نذّكر في هالمطارح ..غوش ابشاويته واذواده
لاقابل حايش لاسارح .. كي ماكان سبيل العاده
جابه لي منام البارح .. ما راسي هاوا لوساده
نجع الي فالزول ايطارح .. موساهل ترقيع بياده
لاضنّي يفرح به فارح .. نازل في دارا ايتقاده
ياما كان عليهم مارح .. ضين وذود كثير اعداده
ركّابين الكوت القارح ..لاجا عايم في ملهاده
ركازين الصقر الجارح .. ياخذ قدام الصياده
لكن خلينا نصّارح .. نكمى كيده ..هذي موش اول تبليده
==============================
نذّكر في هالبراقي .. غوش نزل في وان ربيعه
لو تايق نازل لاراقي .. تحلف مقطوعين قطيعه
عندي عقل امدعّا شاقي .. عالوهام اكثر تقديعه
نحساب الا فيه انلاقي .. تذكار ايهاون تلذيعه
ثاريته ما منهم باقي .. كي من جتم موت سريعه
هاكن مالماقي للماقي .. دمع انزيده .. كان اشوي لول تبديده
==================================
ابكاهن موعالدار اخصوص.. علي اللي فيها كان ونس
اللي كيف اتقضقيض الموس .. امقضقض جوفي فيه انحس
امواهيم انجيهن وانحوس .. علي غيابي خص وقص
بقن لا دايس لامديوس .. اقبوره لاحس ولا مس
اوجوه عزيزه زين وكوس .. اللي عالعيب ايقولوا حس
اكبار عقول وصغر انفوس .. معا دنواهم تستانس
الدنيا تقدع بالمنكوس ... اتنص وماتقبل شي نَصْ
اتولي واترد المريوس ... اتزقه يصبّح رايس
اتطلع كم خريج احبوس .. وتحبس من كان ايحبّس
اتخلي للذيلي ناموس .. اوقات ولجواد اتمحمس
اتروّح في صيفات عروس .. وتصبّح خادم في خص
اتخلي بو تيار افلوس .. الدنيا يشحت كي تعكس
امفلس ماعد فيده دوس .. اللي كان ايشير عاللص
الا اللي من وقته معكوس .. اهموم اتزيده .. والاّ هم قديم اتحيده
====================================
نذّكر فيهن لاديمه .. كذّاب ان غابن عن بالي
كانن فيه انجوع اقليمه .. منطرحات اكبار نزالي
مشهوره بسماح السيمه .. فوق ارقاب جناح الجالي
باذواد اسماح وتغليمه .. ماللي مو سايقهن والي
غيّر عالوقت وتبريمه .. جيت القيت جباهن خالي
متمولص قابي قريمه .. كي غيطانا كي المعالي
يقهر شينات امواهيمه .. قال اللي دسته بقبالي
خالي من طير ام ابريمه .. يابال الجفال الفالي
والدنيا مي دار امقيمه .. ديما عادتا رحّالي
تاتي بالبحري ونسيمه .. واتجيك بصرهاد قبالي
تعزم نين اتقول كريمه .. واتجي بخلتا فالتالي
لاتعرف طاري تحشيمه .. من والي لاتخشى والي
مركوب هذين براريمه .. سابق جيده .. مرات ومرات قعيده
نذّكر في هالهويده .....