اعراس عرب البيضاء

أعراس جماعة البيضاء

تقاليدنا - عاداتنا - حضارتنا
الأسبوع قبل العرس حلويات وغيطة ما هنا بكل اكوش ولعات وطواجين ودرابيك مالجنب
أسبوع العرس
(طبعا من يوم)
السبت
يعلقوا الأسراب( الضوايا )عالحوش ويشربوا شاهي وكعك وديس فالشارع وسيارات زحمة
الأحد
مكسدين نفس الشي فالشارع وشاهي وكعك عالق لعند أخر يوم
تلبيس الشقة
العروس اقريب اتجيب حوش هلها كلا
كان مش 3 كناتر اشوية
1- الصالون والفرشة وتوابعة(دار المقعد)
2-دبش المطبخ كامل احتمال السنة الجاية يجيبن حتى الخضرة
3- حتى الحمام يجيبولا في فرش وتحف ودواليب شوفوا جوكم
الاثنين
مرات عندهم حنة جو غيطة وسيارات يبوا يمشوا لهل العروس طبعا العروس ملفوفة في جرد في عز الصيف والعة فيها نار وعلى حسب لون الجرد مرات احمر ومرات بودري
ايشوفوا هل العروس ويروحوا طبعا غيطة غادي
هل العروس يغنوا
(يا مبروك عليك الحنة درتي حوش اتجينا منه)
والعزايز واخدات تركينة وعلم قالب الدنيا ما عاد ايكملن بكل
بعدها يروحوا بيب بيب
الثلاثاء
(السياق) المصرف
اينوضوا بدري يا فتاح يا عليم مالساعة سبعة شور سوق الخضرة ايجيبوا الخضرة ومعدات التنظيف مالأخير كان عريس امورق ايجيب السوق كله وكان راقد ريح الله غالب عليه ايجيب ربطة كسبر وربطة معدنوس وسياقة في سيارة ومكنسة فالسيارة الأخرى
وطشة بصل وكيلوين طماطم ايتفتف من هنا ومن هنا
يملوهن كلهن فالسيارات امعاهن عرم عزايز عالجو مرات عزوزين ثلاثة
أنسيت حاجة مهمة امعا هذا كله جماااااااااااااااااال ولا عجاااااااااااااااااااااال والا خرفاااااااااان "حوالة"( عليك شعب مفتري ) قاعد في سيارة ابروحة طبعا
يمشوا بيهن شور العروس ينزلن العزايز ويبدن فيها
العزوز الأولى
(عمري ما بركت أجمالي غير ع اللي قدره عالي)
وراها العزوز الأخرى
(مش ساهل تبريك جملنا غير على اللي يستاهلنا)
واتنوض من غادي العزوز الأخرى
(يا مبروك عليه جهازه واخد من عيلة ممتازة)
المهم يقعدن ايمنن عليهم بالجمل ويفوتوا العريس ما يغنوا عليه بكل اتقول اللي منجوز جمل
طبعا أكيد هل العروس دايرين فطور لهل العريس
لكن على حسب كان هل العروس عندهم ذوق ايديروا حاجة كويسة طبيخة (قلايا) (كبدة وجو)ع الصبح يا فتاح
وكان عاد هم من يالا ايديروا اشوية تن وحلوة معجونة مع إنهن مش شور بعضهن بكل
يسمطوهن هل العريس ويروحوا
بيب بيب بيب
الأربعاء
(الرمي) اللي هوا يمشوا ايشيلوا الكسوة للعروس وحنة ودنيا حايسة
طبعا العروس لابسة فيلو فالكوشة ومسرح وجو مش عادي
وناس جاية للعرس
بعد اشوية ايجوا هل العريس بيب بيب بيب
ايشوفوا العروس وايروحوا واتحنيها أم العريس
اتنوض عزوز مالجنب اتقول
(هالعزوز اللي حناتك حطيها بين اعويناتك)
ايلبسوا العروس العقد وايغنوا احذاها اشوية ومرات في طحنة بين هل العريس والعروس فالغنا
بعدها ايروحوا هل العريس
الخميس
اليوم العالمي عند هل العريس خيم وعشاء رجالة وشاهي
وطاولات في مسرح الصبايا وكوشة جو جو
ايجوا المعازيم بعد المغرب للعرس واتجي العروس مع الساعة 9 ولا 9 ونص على حسب الجو
ومرات يخش العريس وايجيبوله تورتة ياكل هو والعروس
معا خشة العريس ايغنوا مالجنب ايقولوا
(ماشاء الله عليك عريس اتقول فرنسي من باريس)
ما اتعدلوش عليها واجد الأغنية أصلا مرات العريس يفجع وهم ايشوفوا فيه سمح!!
وأغنية وحدة أخرى
(بارك للسلطان تهنى جابوله نقراش الحنة)
بعد قعمز العريس وياكل التورتة هو وعروسته
اتنوض عزوز مالجنب اتقول
(واسطة يا واسطة واحد ياكل واحد لا)

بعدها العريس ياخد عروسته شور حوش

بعدها ايروحوا الناس كلهم
الجمعة
اختصروا بدال الأسبوع بعد سبعة أيام
خلوه يوم الجمعة
يعني يوم الجمعة أسبوع عند هل العريس
دايرين العشاء كسكسوا ومشروب وامصير ومخلل وبوريك ومبطن ....الخ
تلبس العروس عربي (محزمة)مرات طرابلسي ومرات شرقاوي التحزيم عالجو

وامعاه ذهب من فوق لتحت عقد ونبيلة ...الخ
تقعمز فالمسرح والعريس بره معا الرجالة لابس عربي حتى هوا,, مش (محزم) هههههه
جلابية وكاط (سورية زبدة)على قولتهم
وامقمعز في الخيمة معا أصحابه وأحبابه
بعدها ايجوا هل العروس ايجيبوا حلويات وموالح ايوزعوهن ع الناس وبعدها أيفض العرس وكل واحد في حاله
وكان العروس عندها ذوق أتجيب حاجة كويسة لخوات الراجل وأمه وكان من يالا أتجيب ساعات أي حاجة!!

طبعا العرس كمل!!!!
عقبالكم كلكم إن شاء الله

انا انكملك القصه
بعد عدة اشهر
لقيت العرسان في المحكمه
مش عارف شن يبو
منور بكل يامان lol!

هههههههههه

والله صدقت يا ابن الجبل

شكرا يا بيضاوي على الشرح

لان والله في حاجات مش فاهمتهن

عدد المساهمات : 4 تاريخ التسجيل : 04/10/2010

العزوز الأولى
(عمري ما بركت أجمالي غير ع اللي قدره عالي)
وراها العزوز الأخرى

(مش ساهل تبريك جملنا غير على اللي يستاهلنا)
واتنوض من غادي العزوز الأخرى

(يا مبروك عليه جهازه واخد من عيلة ممتازة)

هضا جو الاعراس بعدين بعد ما يكمل العرس ايجي العريس يلقى روحا غارق في الدين------------مشكور بيضاوي