البيضاوي
عدد المساهمات : 61
تاريخ التسجيل : 24/09/2010
العمر : 35
 | | موضوع: شتاوي عالعين الجمعة سبتمبر 24, 2010 12:41 pm | |
| شتاوي على العين
حسادك ياعين انماحو *** كيف لأبراج أمريكا طاحو
ياعيني رومي فرقاهم *** خانوك وما وفو راهم
خوانين عزا مافيهم *** خسارة يا عيني تبيهم
بين النوم وبين وسادة *** ديما ياعيني شرادة
عندي عين قليلة والي *** بايعها الأول والتالي
عندي عين كسيرة خاطر *** شالت من الأوهام قناطر
كان مايجي ياعين طز *** عزيز الي يكرب في العز
عندي عين الله لا يروعك *** تبكي كان طرا موضوعك
ابكي ياعيني بأعلا صوت *** عزيز ميت في غيرك موت
نحسابك ياعين فطمتي *** لين على المرهون خطمتي
نرمشت العين انريد انشوف *** كبدي على الغالي ملهوف
ياعيني في عز ربيعك *** مانحساب عزيز يبيعك
يوم فراقه شانت عيني *** حتى ع الضيف لي يجيني
عيني راضية في المنام********اتشوف العزيز وتنعمى
لي داير للعين سريب *** انعنه يبقا فيه نصيب
مرهونين العين عموها *** بالكاد تمشي يخلوها
ياغالي وش يرضيك *** منعميات عيوني علبك
كان بكت عيني خلوها *** تبكي على لي ما يبوها
يوم غلاهم ما شاورتي *** خانوني يا عين تذكرتي
انتي يا عين عزيزك خانك *** دار الخطا شمت عدوانك
عندي نا والعين عزيله *** مانطلق الطير ونجريله
ياعيني عزاك ادموعي *** الغالي سكر ناموضوعي
عيني ماجهاش النوم *** تحلم بي غاليها دوم
ريفتي ياعين وصفتي *** ولي في بالك ماشفتي
عندي نضرت عين عجيبه *** لي انحطه في راسي انجيبه
مانبي اللولاف انسيب *** لكن بخت العين عطيب
صابره عيني مسمحها *** حتى كان عزيز جرحها
قلت العين ايش امبكيها *** ثار القديم املاقيها
بكا عيني ع المرهونين *** بكا عبرة مش تجقنين
شالت فيك العين نضرها *** يامرهون اجبر خاطرها
على عيني فرقاهم طال *** تذرف تذريف الشلال
العين عموها ناس اعزاز *** تريد اتركب العين قزاز
عيني ع الولاف انهدت *** قالت يا جابت ياودت
الله كاتب على العين اندير *** غوالي ويكونو للغير
بالعين السوده غمزاته *** خلاته يبرم خلاته
انتي يا عين عطيبت حظ *** اديري صوب اسبوع يفظ
دمع العين لي ميلوعه ** زاد ولوعه ** وين جبد عقلي موضوعه
عليهم رايفنا ياعين *** غوالي غابو قلنا وين
ياعيني ع الدار حلفتي *** لكن جاروك وخالفتي
عيني سالت يوم خطاهم *** وانعميت ساعة فرقاهم
حتى كان الجديداطعمه *** ابكي يا عين ع القدمه
مره مره يدردر شراب العين *** يطلع بره يخطر عليه القديم مره مره
رزقي نا والعين ع الله *** تربح شيل شقاقك كله
يامعة عيني حراقه *** منهالة من طول فراقه
تقازك ياعين مكشر *** مبا بي اللولاف يبشر
مكدرني يانوم العين *** تخطرلي غير امراهين
******
وأخيرا "حوار بين العين والكبد والقلب "
الكبد قالت للعين : جديد دوري ياعين ... القديمين ماعاد تلحضي
ردت العين وقالت : القديم وين فارقك يا كبد ... بكيت لين دمعي غسلك
سمعهن القلب وقال : القديم وماعاد يردلكن ... نسمع في دوشتكم كنكن | |
|
أثينا
عدد المساهمات : 162
تاريخ التسجيل : 09/09/2011
العمر : 28
الموقع : الجبل الأخضر
المزاج : مبسوط
| | موضوع: رد: شتاوي عالعين الأحد سبتمبر 11, 2011 6:37 pm | |
| بكيتي واجد ع لولاف..........بكا ما زادك غير اريف
شـكـراً | |
|
عيون البحر
عدد المساهمات : 350
تاريخ التسجيل : 05/09/2011
العمر : 32
الموقع : البيضاء
المزاج : هادئ
| | موضوع: رد: شتاوي عالعين الأربعاء سبتمبر 14, 2011 8:27 pm | |
| | |
|
